തിരിച്ചു പോകുന്ന മഅ്ദനിയും
തിരിച്ചു വരാത്ത നാവികരും
നീണ്ടകരയില്‍ മത്സ്യബന്ധനത്തിലേര്‍പ്പെട്ടിരുന്ന മത്സ്യത്തൊഴിലാളികളെ വെടിവെച്ചുകൊന്ന കേസിലാണ് എന്റിക്ക ലെക്സി എന്ന ഇറ്റാലിയന്‍ കപ്പലിലെ നാവികര്‍ ഇന്ത്യയില്‍ വിചാരണ നേരിട്ടുകൊണ്ടിരുന്നത്. നേരത്തെ ക്രിസ്മസ്സ് ആഘോഷിക്കുന്നതിനായി നാട്ടില്‍ പോയ ഇവര്‍ വ്യവസ്ഥപ്രകാരം തിരിച്ചെത്തിയിരുന്നു. കടല്‍ കൊലയുമായി ബന്ധപ്പെട്ട വെടിവെപ്പ് നടന്നത് അന്താരാഷ്ട്ര കപ്പല്‍ ചാലിലായതിനാല്‍ വിചാരണ നടപടികള്‍ ഇറ്റലിയില്‍ നടത്തണമെന്നായിരുന്നു ഇറ്റാലിയന്‍ അധികൃതരുടെ നിലപാട്. ഇതേ കാരണങ്ങള്‍ ഉന്നയിച്ചാണ് കേരളത്തിന് കേസില്‍ ഇടപെടാനും വിചാരണ നടത്താനും അധികാരമില്ലെന്ന് സുപ്രീം കോടതി വ്യക്തമാക്കിയത്. ഇത് പ്രകാരം ദല്‍ഹിയിലെ ഇറ്റാലിയന്‍ എംബസിയിലേക്ക് ഇവരെ മാറ്റുകയും ചെയ്തു. ഒടുവില്‍ പരമോന്നത നീതിപീഠത്തെ കബളിപ്പിച്ച് സ്വന്തം മണ്ണിലേക്ക് ഇറ്റാലിയന്‍ ഭരണകൂടത്തിന്റെ തണലില്‍ നാവികര്‍ തിരിച്ചെത്തുകയും ചെയ്തിരിക്കുന്നു.
വിചാരണ തടവുകാരെന്ന നിലയിലാണ് ഇറ്റാലിയന്‍ നാവികരും അബ്ദുന്നാസര്‍ മഅ്ദനി ഉള്‍പ്പെടെയുള്ളവരും താരതമ്യത്തിന് വിധേയമാക്കപ്പെടേണ്ടത്. കടലില്‍ വെച്ച് അരുംകൊല നടത്തിയവരെന്ന് വ്യക്തതയുണ്ടായിട്ടും നാവികരുടെ കാര്യത്തില്‍ ഇറ്റാലിയന്‍ ഭരണകൂടം കാണിച്ച നിലപാടിന്റെ മാനുഷിക മുഖം ഇന്ത്യയിലെ വിവിധ ജയിലുകളില്‍ വിചാരണ തടവുകാരായി കഴിയുന്നവരുടെ കാര്യത്തില്‍ രാജ്യത്തിന്റെ ഭരണകൂടത്തില്‍ നിന്നുണ്ടാകുന്നില്ലെന്നത് വസ്തുതയായി നിലനില്‍ക്കുന്നതാണ്. സംശയകരമായ സാഹചര്യമെന്ന ഒറ്റക്കാരണം ഉയര്‍ത്തി വര്‍ഷങ്ങളായി വിചാരണ തടവ് നേരിടുന്നവരില്‍ ബഹുഭൂരിപക്ഷവും മുസ്ളിം സമുദായത്തില്‍ നിന്നുള്ളവരാണെന്നതും വസ്തുതയാണ്. രാഷ്ട്രപതിക്കും, പാര്‍ലിമെന്റിനും മുന്നില്‍ ഇത് സംബന്ധിച്ച രേഖകളും, പ്രസ്താവനകളും ഇതിനകം നിരവധിയാണ് സമര്‍പ്പിക്കപ്പെട്ടിരിക്കുന്നത്. ഇ.ടി മുഹമ്മദ് ബഷീര്‍ കഴിഞ്ഞ ദിവസം പാര്‍ലിമെന്റില്‍ ഇതുമായി ബന്ധപ്പെട്ട് വ്യക്തമായ വിശദീകരണം നടത്തുകയും, സി.പി.എമ്മിന്റെ നേതൃത്വത്തില്‍ ഇടതുപക്ഷ സംഘടനകള്‍ രാഷ്ട്രപതിക്ക് നിവേദനം സമര്‍പ്പിക്കുകയും ചെയ്തിരുന്നു.
ഐ.എസ്.എസ് രൂപീകരിച്ച ശേഷം മഅ്ദനി നടത്തിയ പ്രസംഗങ്ങളിലെ തീവ്രത അതിരുവിട്ടതും, അതീവ ഗുരുതരമായിരുന്നുവെന്നതില്‍ അദ്ദേഹത്തിന് പോലും തര്‍ക്കമില്ല. കോയമ്പത്തൂര്‍ ജയിലില്‍ നിന്ന് മോചിതനായ ശേഷം ശംഖ്മുഖം കടപ്പുറത്ത് നല്‍കിയ സ്വീകരണത്തില്‍ മഅ്ദനി ഇത് തുറന്ന് പറഞ്ഞതുമാണ്. കേരളീയ സമൂഹത്തോട് ഇതിന്റെ പേരില്‍ മാപ്പ് പറയുകയും ചെയ്തിരുന്നു. ഒമ്പതര വര്‍ഷത്തെ വിചാരണ തടവില്‍ അദ്ദേഹത്തിനുണ്ടായ സകല നഷ്ടങ്ങളും മുന്‍കഴിഞ്ഞ കാലത്തെ ആവേശം അലതല്ലിയ പ്രവര്‍ത്തനങ്ങള്‍ക്കുള്ള പ്രായശ്ചിത്തമായി കണക്കാക്കി ആശ്വസിക്കാം. ഒരു വ്യക്തി തന്റെ പഴയ കാലത്തെ അപക്വമായ പ്രവര്‍ത്തനങ്ങളെ ഏറ്റുപറഞ്ഞ് മാനസാന്തരത്തിലൂടെ ന•യുടെ വഴിയെ നടക്കാന്‍ സന്നദ്ധമായാല്‍ അതിനെ വിശാലതയോടെ സ്വീകരിക്കേണ്ടതിന് പകരം മഞ്ഞക്കണ്ണടയുമായി അരിഞ്ഞു വീഴ്ത്താന്‍ തുനിഞ്ഞിറങ്ങിയാല്‍ അനുഭവം മഅ്ദനിയുടേതായിരിക്കുമെന്ന ഗുണപാഠം ഇന്ത്യന്‍ ജനാധിപത്യ സംവിധാനത്തിന് കറുത്ത കുത്ത് മാത്രമായിരിക്കും സമ്മാനിക്കുക. രണ്ടാം ഘട്ട വിചാരണ തടവിന്റെ കാരണമായി മഅ്ദനിയുടെ മേല്‍ ചാര്‍ത്തുന്ന ബംഗളൂരു സ്ഫോടന കേസിലെ ഗൂഡാലോചന വിചാരണവേളയില്‍ തെളിയിക്കപ്പെടാന്‍ സാധിച്ചില്ലെങ്കില്‍ തൂക്കിലേറ്റപ്പെടുക ഇന്ത്യന്‍ നീതിന്യായ വ്യവസ്ഥയായിരിക്കും. ഒരു കാലില്ലാത്ത, ഒരു കണ്ണിന്റെ കാഴ്ച ശക്തി പൂര്‍ണ്ണമായും നഷ്ടപ്പെട്ട, ആന്തരികാവയവങ്ങള്‍ പൂര്‍ണ്ണതയോടെ കാര്യക്ഷമമല്ലാത്ത ഒരു മനുഷ്യനു മുന്നില്‍ ജാമ്യമെന്ന അവകാശം കൊട്ടിയടക്കുമ്പോള്‍ കരിഞ്ഞു പോകുന്നത് നീതിയെന്ന പ്രകാശകിരണമാണ്. ബംഗളൂരു സ്ഫോടനത്തില്‍ സാക്ഷി മൊഴികള്‍ മഅ്ദനിക്കെതിരാണെന്ന് അന്വേഷണവുമായി ബന്ധപ്പെട്ടവര്‍ ആവര്‍ത്തിക്കുമ്പോഴഉം അതിനുള്ള സാഹചര്യ തെളിവുകളിലേക്ക് പോലുമെത്താന്‍ പുറത്തു നിന്ന് നിരീക്ഷിക്കുന്നവര്‍ക്കാകുന്നില്ല. മാധ്യമ പ്രവര്‍ത്തകയായ കെ.കെ ഷാഹിന നടത്തിയ അന്വേഷണാത്മക പത്ര പ്രവര്‍ത്തനവും, അതിന്റെ അനന്തര ഫലങ്ങളും മായാത്ത വിവരങ്ങളായി നിലനില്‍ക്കുന്നവയാണ്.
മഅ്ദനിക്കെതിരെ നടക്കുന്നത് മനുഷ്യാവകാശ ലംഘനവും, നീതി നിഷേധവുമാണെന്നതില്‍ കേരളീയ പൊതു സമൂഹത്തിന് തര്‍ക്കമില്ല. മഅ്ദനിയെ രാജ്യദ്രോഹിയും, ഭീകരവാദിയുമാക്കാന്‍ സംഘപരിവാര്‍ കേന്ദ്രങ്ങളില്‍ നിന്ന് കൊണ്ടു പിടിച്ച ശ്രമങ്ങള്‍ തുടരുമ്പോഴും അതിനെ മുഖവിലക്കെടുക്കാന്‍ കേരളീയ സമൂഹം തയ്യാറല്ലെന്നതാണ് മഅ്ദനിയുടെ മകളുടെ വിവാഹ ചടങ്ങില്‍ അദ്ദേഹത്തോടൊപ്പം അണി നിരന്ന നേതാക്കളുടെ നീണ്ട നിര പ്രകടമാക്കുന്നത്. സംസ്ഥാനത്തെ മുഴുവന്‍ രാഷ്ട്രീയ പാര്‍ട്ടികളുടെയും നേതൃനിരയെ സാക്ഷിയാക്കിക്കൊണ്ട് മഅ്ദനി പറഞ്ഞ കാര്യങ്ങള്‍ നിതിയുക്തമായ രാഷ്ട്ര ഘടനയെ സ്വപ്നം കാണുന്ന സുമനസ്സുകളില്‍ ഇടിമുഴക്കം സൃഷ്ടിക്കുന്നതായിരുന്നു. നീതിയുടെ പ്രകാശ കിരണം പോലും തന്നില്‍ പതിക്കുമെന്ന പ്രതീക്ഷയില്ലെന്ന് മഅ്ദനി പറയുമ്പോള്‍ തലകുനിക്കേണ്ടി വരുന്നത് ഓരോ ഇന്ത്യക്കാരനുമാണ്. സമ്പൂര്‍ണ്ണ നീതിന്യായ വ്യവസ്ഥയുടെ പരിഛേദമാണ് ഇന്ത്യയെന്ന മഹാരാജ്യമെന്ന് അറിയാനും, കേള്‍ക്കാനുമാണ് ഇവിടത്തെ ഓരോ പൌരനും ആഗ്രഹിക്കുന്നത്.മകളുടെ വിവാഹവേദിയില്‍ മഅ്ദനി നടത്തിയ പ്രഭാഷണത്തിലൂടെ പുറത്ത് വന്നത് നീതി നിഷേധിക്കപ്പെട്ടവന്റെ നിസ്സഹായമായ നൊമ്പരങ്ങളായിരുന്നു. എന്നാലിതിനെ തീവ്രവാദത്തിന്റെ മുഖപടം നല്‍കി മൂക്കോളം മുങ്ങിയവനെ ആഴക്കയങ്ങളിലേക്ക് വീണ്ടും ചവിട്ടിത്താഴ്ത്താന്‍ ചില മഞ്ഞക്കണ്ണട ധാരികള്‍ അപശബ്ദങ്ങളായി ഉണ്ടായിരുന്നുവെന്നത് കാണാതെ പോയിക്കൂട. വിചാരണ തടവെന്നത് മഅ്ദനിക്ക് മുന്നില്‍ മരണം വരെയുള്ള ജീവപര്യന്തമാക്കി മാറ്റാന്‍ വിവാഹവേദിയിലെ പ്രഭാഷണത്തില്‍ നിന്ന് എന്തെങ്കിലും കിട്ടുമോയെന്ന് ഭൂതക്കണ്ണാടി വെച്ച് ഇവര്‍ നിരീക്ഷണം നടത്തിയിട്ടുണ്ടാകുമെന്നതിലും തര്‍ക്കമില്ല. അഞ്ച് ദിവസത്തെ ജാമ്യത്തിന് ശേഷം മഅ്ദനി വീണ്ടും പരപ്പന അഗ്രഹാര ജയിലിലേക്ക് മടങ്ങുമ്പോള്‍ ഉടന്‍ തിരിച്ചുവരാനാകുമെന്ന പ്രതീക്ഷ അദ്ദേഹത്തിനില്ല. താന്‍ നിരപരാധിയാണെന്നും, കുറ്റവാളിയോ, രാജ്യദ്രോഹിയോ, തീവ്രവാദിയോ അല്ലെന്നും, പിറന്ന മണ്ണിനെ സ്നേഹിക്കുന്നവനാണെന്നും ദൈവത്തിന് മുന്നില്‍ പൊട്ടിക്കരഞ്ഞ് പ്രാര്‍ത്ഥന നിര്‍വ്വഹിച്ചശേഷമാണ് മഅ്ദനി കേരളത്തോട് വീണ്ടും യാത്ര പറയുന്നത്.
Comments
Post a Comment