സ്റാര്‍ട്ട്, ക്യാമറ, ആക്ഷന്‍...................
ഒരു ഇടിവെട്ട് സിനിമ കണ്ടിറങ്ങിയ പ്രതീതിയാണ് കേരളക്കരയിലെ മാന്യമഹാജനങ്ങള്‍ക്ക്. പൊള്ളുന്ന വെയിലില്‍ മണിക്കൂറുകളോളം വരി നിന്നാണ് വോട്ട് ചെയ്തതെങ്കിലും പാഴായില്ലല്ലോയെന്ന ആത്മസംതൃപ്തിയാണ് എല്ലാവര്‍ക്കും. ഫോട്ടോ ഫിനിഷിംഗിലാണ് സിനിമ റിലീസ് ചെയ്തതെങ്കിലും 140 പേരും അഭിനയത്തികവിന്റെ പരിപൂര്‍ണ്ണതയാണ് പ്രകടമാക്കുന്നത്. സ്റണ്ടും, റൊമാന്‍സും, പാട്ടും, തമാശയും, സൂപ്പര്‍ ഡയലോഗുകളും കോര്‍ത്തിണക്കിയ മുഴുനീള ചിത്രത്തില്‍ ബലാത്സംഗവും ഇടം പിടിച്ചു. സെന്‍സര്‍ ബോര്‍ഡ് ഇടപെട്ട് ബലാത്സംഗ സീന്‍ ഒഴിവാക്കാന്‍ ശ്രമിച്ചുവെങ്കിലും പൂഞ്ഞാറില്‍ നിന്നുള്ള സൂപ്പര്‍ സ്റാറിന് ഇത് കൂടിയേ തീരുവെന്ന നിര്‍ബന്ധം. ബലാത്സംഗ സീനില്‍ അഭിനയിക്കാമെന്നേറ്റ സഹ നടി പൊടുന്നനെ പിന്‍മാറിയത് ആശയകുഴപ്പത്തിനിടയാക്കിയെങ്കിലും നിലപാടില്‍ നിന്ന് പി•ാറില്ലെന്ന വാശിയിലാണ് പൂഞ്ഞാറിലെ ഈ വി.ഐ.പി.
ചൂണ്ടുവരില്‍ ആകാശത്തേക്കുയര്‍ത്തി ഊണിലും, ഉറക്കിലും “ഷിറ്റ്” ഉരുവിട്ടിരുന്ന പഴയൊരു കമ്മീഷണറെ ഓര്‍മ്മയുണ്ടോ. പല മുഖങ്ങള്‍ കയറിയിറങ്ങിയതാണെങ്കിലും മറക്കില്ല ആ മുഖമൊരിക്കലും. ഇദ്ദേഹത്തിന്റെ പിന്‍ഗാമിയാകാന്‍ കൊതിച്ച ഒരു അസിസ്റന്റ് പോലീസ് കമ്മീഷണറുടെ ഉന്നമില്ലാ വെടികളാണ് മേല്‍ പറഞ്ഞ സിനിമയ്ക്ക് പാശ്ചാത്തലമൊരുക്കിയത്. വെടിയെങ്ങാനും ഉന്നം പിഴക്കാതെ വെച്ചിടത്ത് കൊണ്ടിരുന്നെങ്കില്‍ സിനിമ ഓസ്കാറിലേക്ക് പരിഗണിക്കപ്പെട്ടേനെ. നിയമസഭ മന്ദിരം, വാളകം, പത്തനാപുരം എന്നിവടങ്ങളിലായി നടന്ന സിനിമയുടെ ചിത്രീകരണം പ്രേക്ഷക ലോകത്തിന് മറക്കാനാകാത്ത അനുഭവമായിരുന്നുവെന്ന് പറയാതെവയ്യ.
നിയമസഭാ സമ്മേളനം കാണാന്‍ സന്ദര്‍ശക ഗാലറിയില്‍ എത്തുന്നവര്‍ സഭയോട് അനാദരവ് കാണിക്കുന്ന തരത്തില്‍ ശരീര ചലനങ്ങള്‍ നടത്താന്‍ പോലും പാടില്ലെന്നാണ് അലിഖിതമായ പെരുമാറ്റച്ചട്ടം. എന്നാല്‍ സഭയുടെ അകത്തളത്തില്‍ ഇരിപ്പുറപ്പിച്ചവര്‍ക്ക് ഇത് ബാധകമല്ലെന്ന് തോന്നിപ്പോകുന്ന തരത്തിലാണ് കഴിഞ്ഞ ദിവസങ്ങളില്‍ ഓരോ സംഭവവികാസങ്ങളും അരങ്ങേറിയത്. ചോദ്യോത്തരവേളയ്ക്ക് പുറമെയുള്ള ചില സെഷനുകള്‍ ചാനലുകളിലൂടെ പുറം ലോകത്തെത്തിയപ്പോള്‍ നമ്മുടെ മന്ത്രിമാരുടെയും, എം.എല്‍.എമാരുടെയും തനി നിറം പ്രകടമായി. സഭയ്ക്കകത്തെ പുലികളെ എലികളാക്കണമെങ്കില്‍ നിയമസഭാ സമ്മേളനം പൂര്‍ണ്ണമായും പുറം ലോകത്തെത്തിക്കുന്ന സാഹചര്യമുണ്ടാകണം. നമ്മുടെ ജനപ്രതിനിധികളെ ഷണ്ഡീകരിക്കുക എന്നതല്ല ഇതിലൂടെ അര്‍ത്ഥമാക്കുന്നത്. സഭാതലം പൊതുജനമെന്ന ലോകത്തിനു വേണ്ടിയുള്ള ധര്‍മ്മയുദ്ധഭൂമിയായതുകൊണ്ടു തന്നെ പോരാളികള്‍ക്ക് ധര്‍മ്മവും മൂല്യവും കൈവിടാതിരിക്കുവാന്‍ വേണ്ടിയാണിത്.
നിയമസഭ സമ്മേളനങ്ങള്‍ പ്രജകളുടെ ക്ഷേമ, ഐശ്വര്യങ്ങള്‍ക്കായുള്ള തീരുമാനങ്ങള്‍ രൂപപ്പെടേണ്ട വേദിയാണ്. ജനങ്ങള്‍ക്ക് വേണ്ടിയുള്ള നിയമനിര്‍മ്മാണങ്ങളുടെ കേന്ദ്രമായതിനാലാണ് സഭ ആദരവിന്റെ മൂര്‍ത്തീഭാവമായി മാറുന്നത്. എന്നാലിന്ന് നിയമസഭ സമ്മേളനങ്ങള്‍ ചേരുന്നത് പ്രതിപക്ഷത്തിന് ഇറങ്ങിപ്പോകാനാണെന്ന രൂപത്തിലേക്ക് മാറിയിരിക്കുന്നു. വാക്കൌട്ട് സഭയെ ബോയ്ക്കോട്ട് ചെയ്യുന്നതിലേക്കെത്തിയിരിക്കുന്നു. സഭയുടെ നടുത്തളം അങ്കത്തളമായി മാറുന്നു. സഭയില്‍ അംഗങ്ങളില്‍ പലരും മദ്യപിച്ചെത്തുന്നുവെന്ന് മന്ത്രിക്കു തന്നെ പറയേണ്ട ഗതികേടുണ്ടായി. ഇനി മുണ്ടുരിയലും, മുണ്ടുപൊക്കലും, കസേരയേറും വിദൂരമല്ലാത്ത ഭാവിയില്‍ തന്നെ കാണാനാകും. കാണാനും കേള്‍ക്കാനും മാത്രം വിധിക്കപ്പെട്ടവര്‍ ഇതൊക്കെ കണ്ടും കേട്ടും ഇവിടെയൊക്കെത്തന്നെയുണ്ടാകും. ആഭാസങ്ങളുടെ കൂത്തരങ്ങായി നിയമനിര്‍മ്മാണ സഭയേയും, പൊതുവേദികളേയും മാറ്റുന്നതിനു മുമ്പ് നിങ്ങള്‍ മാന്യ•ാരുടെ പ്രതിനിധികളാണെന്ന് ഓര്‍ക്കുന്നത് നന്നായിരിക്കും. നിങ്ങള്‍ പറയുന്നത് തത്സമയം കണ്ടും കേട്ടും പുതിയൊരു തലമുറ വളരുന്നുണ്ട്. പത്തനാപുരം മോഡല്‍ പ്രസംഗങ്ങള്‍ ഏത് വികാരത്തിന്റെ പുറത്തായാലും വളരുന്ന തലമുറയ്ക്ക് നല്‍കുന്ന സന്ദേശമെന്തെന്ന് തിരിച്ചറിയണം. മാന്യതയുടെ നിര്‍വ്വചനം ഓരോരുത്തര്‍ക്കും വ്യത്യസ്തമാകാം. എന്നാലത് പൊതുമാനദണ്ഡത്തിലൊതുങ്ങുന്നതാകണം. അല്ലായെങ്കില്‍ മഹത്തരമായ ജനാധിപത്യ സംവീധാനത്തിന്റെ മുഖത്തായിരിക്കും പുതുതലമുറ കാര്‍ക്കിച്ച് തുപ്പുക.
- കെ.വി.നദീര്‍
അസ്സലാമു അലൈക്കും. നന്നായിട്ടുണ്ട് എന്ന് പറഞ്ഞാല്‍ മതിയാകില്ല നദീര്‍. മുഴുവനായും ഒന്നുക്കൂടി വായിക്കണം.നാട്ടിലേക്ക് വരാനുള്ള തിരക്കിലായതിനാല്‍ ഒന്ന് ഓടിച്ചു വായിക്കാനേ സാധിച്ചുള്ളൂ.
ReplyDeleteമറ്റു ലേഘനങ്ങളും വായിക്കാനുണ്ട്. ഈ രംഗത്ത് ഒരുപാടൊരുപാട് മുന്നേറാന്‍ താങ്കളെ അല്ലാഹു അനുഗ്രഹിക്കട്ടെ.
അസ്സലാമുഅലൈക്കും,
ReplyDeleteനദീര്‍, ചുറ്റുപാടുകളെ നിരീക്ഷിക്കുകയും അതിനെ e കാന്‍വാസില്‍ പകര്‍ത്തുകയും ചെയ്യുന്ന നമ്മുടെ പൊന്നാനിക്കാരന്‍ സുഹൃത്തിന് എല്ലാ ഭാവുകങ്ങളും.