ഒരുമിച്ചിരിക്കാന് ഇടമൊരുക്കാം പരസ്പരം അകലാനും വെറുക്കാനും ഉത്തരവാദപ്പെട്ട കേന്ദ്രങ്ങളില് നിന്നു തന്നെ ആഹ്വാനങ്ങള് മുഴങ്ങുന്ന കാലമാണിത്. ഇതരരെ സംശയത്തോടെ മാത്രം കാണാന് പരിശീലിപ്പിക്കപ്പെടുകയാണ്. കൂടെ കൂട്ടാനാകില്ലെന്ന അയിത്ത വിചാരം മനസ്സുകളെ പറഞ്ഞു പഠിപ്പിക്കുന്നു. മനുഷ്യനെന്ന വിചാരത്തിനപ്പുറം ഏതോ ക്ഷുദ്രജീവിയോടൊന്ന പോലെ അന്യസമുദായക്കാരനോട് പെരുമാറാന് നിരന്തര അശരീരികള് പുറത്തുവരുന്നു. വിദ്വേഷത്തിന്റെ വിഷം കുത്തിവെക്കപ്പെട്ടവര് സാഹോദര്യത്തിന്റെ ഇടങ്ങളെ കുത്തിക്കീറാന് ഒരുമ്പിട്ടിറങ്ങിയ പുതിയ കാലത്ത് ഒരുമിച്ചിരിക്കാനുള്ള ഇടങ്ങളൊരുക്കി പ്രതിരോധനത്തിന്റെ സ്നേഹവേലികളൊരുക്കാന് സമയമായിരിക്കുന്നു. മതത്തിന്റെയും ജാതിയുടേയും പേരില് വേര്തിരിവിന്റെ ആഹ്വാനങ്ങള് ഇത്രമേല് ശക്തിപ്പെട്ട കാലം മുമ്പുണ്ടായിട്ടില്ല. ഒറ്റപ്പെട്ട സംഘങ്ങളുടെ നിരര്ത്ഥകമായ മുറവിളികളായി കേട്ടുതള്ളിയിരുന്നവ ഔദ്യോഗിക സ്വഭാവത്തോടെ ആവര്ത്തിക്കപ്പെടുകയാണ്. അകല്ച്ചയുടെ വഴിയില് കെട്ടി ഉയര്ത്തുന്ന ചുമരുകളെ ദുര്ബലപ്പെടുത്താന് സ്നേഹമനസ്സുകളുടെ കൂട്ടായ്മകള് ശക്തിപ്പെടുത്തുന്നതിലൂടെ സാധ്യമാകും. ഊഹത്തിന്റെയും കേട്...
